Estilo: Música de Cabo Verde

Hoxe son doce, dispostas en abano, batendo con furia e alegría sobre un pano pregado que colocan entre as pernas: o batuko. O trebón percusivo medra e reflúe periodicamente, acompañando cánticos entre os que se colan risos e desafíos. De cando en vez, no medio dunha canción, unha delas sae ao centro da escena, amarrando un xersei ou unha camisa ao cinto e danza mostrando toda a forza do movemento africano, salseando diversidade cultural dende o medio do atlántico. O bruído rebelde de Batuko Tabanka dura tres cuartos de hora: tempo suficiente para poñer a "pel de galiña" a quen escoite estas batukadas, coladeiras, mornas... mesturadas co salseiro cantábrico que aporta Galiza.

Unha proposta que reflicte a mensaxe máis positiva das migracións: o respecto e o diálogo, que poderiamos resumir en dúas palabras: SABI, SABI!!!

Antonina de Cangas, Antonina de San Cibrao, Ivone, Fafá, Beba, Isabel, Dezidéria, Ilda, Mariazinha, Chuca, Belita e Santinha, chámanse entre si polo seu nomezinho, algo que non é nin o seu nome civil nin un alcume senón o seu propio pasaporte mundial.

Tabanka é unha asociación que se fundou hai xa tempo co obxectivo de dignificar a cultura cabo-verdiana, lembrar a procedencia da nai África en todos os expoñentes culturais posíbeis, e a súa música é algún dos múltiples presentes que nos brindan estas polifacéticas mulleres.

Batuko Tabanka en Youtube

Batuko Tabanka en myspace musica

Vindeiras Actuacións

Contacto